Tujhse Ru-Ba-Ru Ho Kar Baatein Karun,
Nigahein Mila Kar Wafa Ke Waade Karun,
Teri Har Ek Ada Par Kar Dun Kayi Shayari,
Har Lafz Mein Wafa Ke Daaway Karun,
Sambhale Nahi Sambhalti Ye Dil Ki Tadap,
Tu Hi Bata Main Kab Tak Yunhi Aahein Bharun..!!!
xai
Sab Khuloos Baaton Mein Sab Karam Khayalon Mein
Bas Zara Wafa Kam Hai Tere Shehr Walon Mein
Pehli Baar Nazron Ne Chaand Boltay Dekha Hai
Hum Jawab Kya Detay Kho Gaye Sawalon Mein
Raat Teri Yaadon Ne Dil Ko Is Tarha Che'ra
Jaise Koi Chutki Le Naram Naram Gaalon Mein
Yun Kisi Ki Aankhon Mein Subha Tak Thay Hum
Jis Tarha Rahe Shabnam Phool Kay Pyaalon Mein
Meri Aankh Kay Taaray Ab Na Dekho Gay Mohsin
Hum Raat Kay Musafir Thay Kho Gaye Ujaalon Mein
xai
Uski Kaali Aankhon Mein Hain Antar Mantar Sab..
Chaaku Waaku, Churiyaan Wuriyan, Khanjar Wanjar Sab..
Jis Din Se Tum Roothay Mujh Se, Roothay Roothay Hain..
Chaadar Waadar, Takiya Wakiya, Bistar Wistar Sab..
Mujhse Bichar Kar Wo Bhi, Kahan Ab Pehle Jaisa Hai..
Pheeke Par Gaye Nain Wain, Kapray Wapray, Zaiwar Waiwar Sab..
xai
Muhabbat Mein Wafaadaari Se Bachiye
Jahan Tak Ho Adakaari Se Bachiye
Har Ek Soorat Bhali Lagti Hai Kuch Din
Lahoo Ki Shobdaa-Kaari Se Bachiye
Sharaafat, Aadmiyat, Dard–Mandi !!
Baray Shehron Mein Beemaari Se Bachiye
Zaroori Kya Har Ek Mehfil Mein Aana
Takalluf Ki Rawadaari Se Bachiye
Bina Pairon Kay Sar Chalte Nahi Hain
Buzurgon Ki Samajhdari Se Bachiye
xai
Wo Tulu-e-Aftab Se Yaad Aate Hain Aksar
Unki Furqat Main Hum Dil Jalatay Hain Aksar
Din Guzar Jata Hai Yaadon Main Unki
Shaam Hone Par Phir Ashk Behtay Hain Aksar
Saara Aalam Raat Ko Soo Jata Hai Jab
Guzray Huay Lamhaat Mujhko Satatay Hain Aksar
Jab Afsurda Hota Hai Dil Ka Aangan Mera
Geet Ghamon Kay Gun'gunatay Hain Aksar
Kabhi Aatay Hain Jo Khuwabon Main Milnay
Aankh Khulney Se Pehle Wo Chor Jatay Hain Aksar
xai
Haq Meri Mohabbat Ka Ada Kyun Nahi Karte ?
Tum Dard To Detay Ho, Dawa Kyun Nahi Karte ?
Kyun Baithay Ho Khamosh Is Tarha Mere Paas Aa Kar ?
Tum Mere Marnay Ki Duaa Kyun Nahi Karte ?
Phoolon Ki Tarha Jism Hai Pathar Ki Tarha Dil,
Janay Tum Mujhse Wafa Kyun Nahi Karte ?
Aankhon Ki Adalat Se Bari Kar To Diya Hai,
Zulfon Se Meri Jaan Reha Kyun Nahi Karte ?
xai
Kitni Shaamein Roshan Hongi Kitne Deep Jalaogi ?
Pyar Ki Pehli Saalgira Tum Kis Kay Sath Manaogi ?
Mein To Ruksat Ho Hi Raha Tha Aaj Tumhari Galiyon Se,
Ab Tum Kis Kay Sath Rahogi ! Kis Ka Sath Nibhaogi ?
Aakhir Woh Din Kab Aayega ! Khilwat Mein Mujhse Tum,
Mere Dil Ka Haal Sunogi, Apna Haal Sunaogi ?
Farz Karo Agar Baad-e-Furkat Mein Tumko Mil Jaon To,
Hairat Mein Par Jaogi Ya Seenay Se Lag Jaogi ?
Jaanay Se Pehle Bas Itna Soch Lo Gar To Behtar Hai,
Dil Ki Galiyan Band Milengi Jab Tum Laut Kar Aaogi..
Theek Hai Tum Lota Do Mujhko Mere Tohfay Aur Khutoot,
Lekin Jo Din Pyar Mein Guzray Wo Kaise Lotaogi ?
Ho Jao Tum Laakh Kisi Ki.. Lekin Phir Bhi Tum,
Mujhse Hi Mansoob Rahogi.. Meri Hi Kehlaogi !!!
xai
Aapko Bhool Jayen Hum Itne To Be-Wafa Nahi
Aap Se Kya Gila Karen Aap Se Kuch Gila Nahi
Hum To Samaj Rahe Thay Ye Tum Milay Pyar Mil Gaya
Ek Tere Dard Kay Siwa Humko To Kuch Mila Nahi
Sheesha-e-Dil Ko Torna Unka To Ek Khel Hai
Hum Hi Se Bhool Ho Gayi Unki Koi Khata Nahi
Kaash Wo Apne Gham Mujhe De De To Kuch Sukoon Milay
Wo Kitna Bad-Naseeb Hai Gham Bhi Jisay Mila Nahi
Baaghi Main Aadmi Se Na Munkir Khuda Ka Tha
Dar'paish Masla Meri Apni Anna Ka Tha
Apne Dhuwain Ko Chor Gaya Aasman Par
Bujhtay Huay Diye Mein Ghuroor Inteha Ka Tha
Dekha To Woh Haseen Laga Saaray Sheher Mein
Socha To Woh Zaheen Bhi Zaalim Bala Ka Tha
Main Khush Hua K Log Ikkathay Hain Sheher Mein
Bahar Gali Mein Shor Lekin Hawa Ka Tha
Usko Ghilaaf-e-Rooh Mein Rakha Sambhaal Kar
MOHSIN Wo Zakham Bhi To Kissi Aashna Ka Tha..
xai
Ye Mast Mast Be-Misaal Aankhen
Nashay Se Har Dum Nidhaal Aankhen
Uthen To Hosh-o-Hawaas Cheenen
Giren To Kar Dain Kamaal Aankhen
Koi Hai Inke Karam Ka Taalib
Kisi Ka Shauq-e-Wisaal Aankhen
Na Yun Jalayen Na Yun Satayen
Karen To Kuch Ye Khayal Aankhen
Hain Jeene Ka Ek Bahana Yaaro
Ye Roh Parwar Jamaal Aankhen
Daraaz Palken Ghazal Aankhen
Musawari Ka Kamaal Aankhen
Sharaab Rab Ne Haraam Kar Di
Magar Rakhin Hain Halaal Aankhen
Hazaron In Se Qatal Huay Hain
Khuda Kay Banday Sambhaal Aankhen
xai